Albertina, DG1934/577, mit deutschem Text

Diser nachuerzeychenter Eren / oder Triumph wagen / ist dem allerdurchleuchtigisten Großmechtigisten herrn weyl
und Keyser Maximilian / hochlöblicher gedechtnuß vuserem [sic!] allergnedigsten hern zu sonderen eren erfunden vnnd
verordent / vnnd zů vnderthenigem gefallen dem großmechtigisten yetz Regierenten Keyser Karolo etc. durch Albrecht
Dürer daselbst in das werck gepracht.

Erstlich / dieweyl jhr Keyserlich May. alle König vnnd herren mit glori / magnificent / eer / vnd wirdigkeyt vbertrifft
so ist der selb wagen auff vier eren reder / darauff ihr Keyserlich May. solcher vbertreflichkeyt halben billich empore
gefürt werden soll / gestelt. Nemlich auff Gloriam / Magnificentiam / Dignitatem / vnnd Honorem.

Nachuolgent seindt an den vier orten des wagens die vier angeltugent / an stat vier seulen gesetzt. Nemlich Justicia
Fortitudo / Prudentia / Temperantia. Auß welchen all der ander tugent jrn anfang vnnd vrsprung haben / an die auch
keyn khönig oder herr volkumen seyn kan / oder mag. Dann wo die Gerechtigkeyt / Manlich sterck des gemüts / die
Vernufft / vnnd Bescheidenheyt mangelt / kann keyn Reych bestendig seyn.


Nach dem Moderatio / vnnd Prouidentia der vernunfft am nachsten sind / füren die selben zwo
tugent die zwey nachsten pferd vor der vernufft / damit der wag mit rechtermaß vnnd fürsichtigkeyt
seinen gang haben mag.

Dieweyl auch dise vier tugendt aneynander hangen / vnnd von einander nit gesondert werden mögen / also / wo eyne
derselben mangelt / das die ander volkummen seyn kan. So sindt die selben vier mit den andern jrn anhangenden
tugendten / so auß jnen fliessen zůsamen gefügt / vnnd ineinander verschlossen. Nemlich / dieweyl Justicia gepürt / vnd
haben můß Veritatem / so helt sie in der lincken handt den krantz der Warheyt. Jn den auch die Messigkeyt mit der
rechten handt greyfft / dann wo die Warheyt nit ist / kann die Gerechtigkeyt nit stat haben. Die Messigkeyt mag auch /
so sie von der Warheyt weycht / nit mer Messigkeyt genant werden.

Mit der rechten handt greyfft Justicia in den krantz Clementie / das zaygt an / daß die Gerechtigkeyt nit ganntz zů
streng / sonder mit Miltigkeyt soll vermischt seyn. Jn disen krantz ist geflochten der mitler krantz Equitatis / dann so
wol als die Gerechtigkeyt nit zu scharpff seyn / also soll sie auch nit alle mal / vnd in allen sachen zůuill lind odder barm=
hertzig / sonder Equa vnd gleych sein / on welche Gleicheyt die Gerechtigkeyt nit besten mag.

Die nachuolgende zwey pferdt werden durch Alacritatem vnd Oportunitatem gefürt. Darumb
als wol sich gezimpt daß zu bequemer zeyt der wagen für sich gee / also gepürt sich auch / das sölchs
frölich vnnd mit eyner frecheyt beschehe.

Deß gleychen greyfft Fortitudo mit der lincken handt in den khrantz Bonitatis / darumb das on rechte frůmkeyt kein
ware sterck seyn kan / auß der selben vrsach ist auch der khrantz Bonitatis in den khrantz Equitatis / vonn welcher
Bonitas nit gescheyden mag werden / geflochten.

Mit der rechten handt helt Fortitudo Constantiam / darumb wo die Bestendigkeyt nit ist / mag Fortitudo nit stat ha
ben. Vnnd ist Fortitudo darumb zůuorderst / vnnd auff die rechte seyten gestelt. Die weyl menigklich vnuerporgen /
das weylund Keyserliche May. hochlöblicher gedechtnuß / mit rechter manlicher sterck des leybs vnnd gemüts / in Kriegßübungen vnnd widerwertigkeyten / alle Khönig vbertroffen hat.

Temperantia helt in der lincken hand den krantz Liberalitatis / mit der die Keyserlich May. sonderlich begabt gewest /
als menigklich kundt ist / der selb krantz hecht an dem mitlen krantz Mansuetudinis / darumb das jr May. mit Senfft
můtigkeit also geziert gewest / das auch die selb in allen hendeln vnd sachen / wie ernstlich / tapfer vnd groß die gewest / gantz
gůtlich vnd bescheyden gehandlet hat / vnd alweg Mansuetudo / als ein edle tochter Temperantie mit geloffen ist.

Firmitudo vnd Velocitas füren die nachuolgenden zweypferd / darumb daß diser wagen / so er
mit schnelheyt gefürt wirdet / dannoch steet sey / vnd mit vestigkeyt gezogen werde.

Gegen die Messikeyt vber steet Prudentia / greyfft mit der lincken handt in den krantz Constantie / welche Bestendig
keyt der Prudentie nit minder dann der Fortitudini zusteet / mit der gerechten handt helt sie den khrantz Jntelligentie / der
sich in den krantz Mansuetudinis flicht / darumb daß die vernufft zůuorderst den verstandt haben můß vnd will.

Vndter dem schadten vnd obdach diser tugendt / wirdet billich der stůl Kayserlicher May. gesetzt / als der so auff diser
erden / nit höher dann allein mit tugendten geziert kan oder mag werden. vnd nach alter gewonheyt der Kriechen vnd
Römer steet hindter Kayserlicher May. stůl ein Victoria / die jhr May. in disem Triumphwagen mit dem krantz des
siegs krönet / in der selben fettich sindt geschriben ettliche Victoria.

Neben disen wagen / damit der nit wanck oder sinck / sind geordent vier tugent die jn halten. Nemlich / Securitas / Fi=
dentia / Grauitas / Perseuerentia. Darumb so die Sicherhayt mit Vertrawen vermischt wirdet / vnd da bey Tapffer
keyt sampt Verharrung mit laufft / kann es nit anders dann eben vnd wol hynauß geen.

Acrimonia vnnd Virilitas sindt den nachuolgenden pferden darumb zugeben / daß der wagen
manlich / vnnd mit einer tapfferkayt gefürt werde.

Vnd damit diser wagen recht vnd wol gefürt werd / ist Ratio zuuorderst an / für ainen fůrman vnd weglayter gesetzt /
darumb das alle bestendige ding mit vernufft geschehen söllen. Die selbige Ratio helt auch zway leytsayl / eyns Nobi
litatis / das ander Potentie / angesehen daß die Keyser. May. alle König vnd herrn mit adel vnd macht übertroffen hat.

Vnd auff daß die pferd so an den wagen gespant sind / nit als vnuernüfftige thieer auß dem wege der Verstendigkeyt
lauffen / sonder dester statlicher durch Vernunfft regiert werden mögen / so hat eyn yetzlich pferdt seine laytter vnd halter /
damit es nit anders geen / noch lauffen möge / dann wie sich nach eygenschafft der selben tugendt gepürt.

Vnd wiewol alle menschen nach dem willen gottes regiert werden / noch dann sagen die weysen / daß in sonderheyt das
hertz des Königs in der handt gotes stee / der das auch nach seinem götlichen wolgefallen wendt vnd khert / darumb so
hecht vor der Keyserlichen May. dise geschrifft. Jn manu dei cor Regis est. Vnd für das wort Cor / ist zu merer zierlig
keyt ain hertz mit ainer Laurea gemalet. Bedewt das edel hertz Keyserlicher May. so mit allen tugendten vnnd eren
gekrönet vnnd geziert gewest ist.

Darnach geen zweypferd die stetigs für sich begeren / werden durch Magnanimitatem vnnd
Audaciam regiert.

Dieweyl auch mit warheyt gesagt werden mag / daß weylund die Kayserliche May. mit jrer zierd vnd Clarheyt auff
erdtrich eben daß das die scheynend Sunn am hymel gewest ist / so wirt ob jrer May. dise schrifft gesetzt. Quod in
celis Sol / hoc in terra Cesar. Vnd ist für das Sol ein Sunn gemalet / vnd für das wort Cesar ain Adler.
Maximilian von Gottes gnaden
E. Römischer Kayser. etc.
Ersamer lieber getrewer / wir haben den Triumphwagen mitsampt der Exposition / den du vns zu vnderthenigem gefal
len zu zier vnsers Triumphs erdacht vnd gestelt. Auch durch Albrecht Thürer auffreyssen lassen / vnnd bey zeyger diß
brieffs zugesendt hast entpfangen / den auch nottürfftigklich vbersehen / vnd tragen an sölichem deinem erfinden fleyß vnd
erbieten sonders gnedigs wolgefallen / sind geneygt / das in sondern gnaden gegen dir zu erkennen / wölten wir dir gnedi=
ger meynung nit verhalten. Geben in vnser Stat Jnßbruck am Neunvndzweyntzigisten Marcii. Anno etc. xviii.
vnsers Reychs am. xxxij. jaren.
Per Regem per se.
Ad Mandatum Cesaree
Maiestatis proprium.
Westner.
Dem Ersamen vnserm Rat / vnd des Reychs lieben getrewen Wilbolden Pirckhaymer.
Damit der die großmütigkeyt vnd kekheyt den wagen nit verfüren / so seind für die selben zuuorderst
zway andere Roß gespandt / die werden durch Experientiam vnd Solertiam gemaystert. Dann wo
die erfarnuß vnd die fůrtrechtigkeyt nit ist / mag die Keckheyt vnd Großmütigkeyt leycht schaden bringen.

Diser wagen ist zu Nürmberg erfunden
gerissen vnnd gedruckt durch Albrechten
Thürer / im jar. M.D.xxii.
Cum gratia et Priuilegio Cesaree Maiestatis.